‘स्त्री’ ने ठरवलं तर ‘ती’ काहीही करू शकते !

हो निश्चितच जग बदलते आहे. पुरुषप्रधान संस्कृतीला मात करत, स्त्री ही आता पुरुषांना खांद्याला खांदा लावून प्रत्येकच क्षेत्रात प्रगतीपथावर अग्रसर होत आहे. 8 मार्च ‘जागतिक महिला दिन’ निमित्त कर्तृत्वशील स्त्री शक्तीला अभिवादन. इतिहास साक्षी आहे ! आजच्या काळासोबतच पूर्व कालीन जगात ही अनेक स्त्रीविरांगणींनी प्रेरणादायक कर्तृत्व आणि नेतृत्व केलं आहे. रावणाच्या बंदिस्तते मध्ये राहणाऱ्या सीतेने दिलेली अग्नी परीक्षा, घोर संकटकाळात छत्रपतींना घडवणाऱ्या राजमाता जिजाऊ, स्वाभिमानासाठी तलवार उचलून लढणाऱ्या राणी मनकर्णिका, स्त्री शिक्षणाचा वसा उचलणाऱ्या सावित्रीबाई फुले, एवरेस्ट शिखर गाठणाऱ्या जुनको ताबेई, संशोधनासाठी पृथ्वीपासून लाखो मैल दूर अंतरिक्षात जाणाऱ्या वॅलेंटिना तेरेश्कोव्हा, कमी वयात सुद्धा जिद्दी आणि चिकाटीने डॉक्टरकी पदवी मिळावणाऱ्या आनंदीबाई जोशी, अशा अनेक स्त्रिया जगासमोर ‘ स्त्रीशक्तीचं ‘ उच्चकोटीचं उदहारण बनून अजरअमर झाल्या आहेत.

       स्त्रीची नैसर्गिक नाजूक शारिक रचना, मनातील भावुकता, हळवेपणा, समाजाकडून होणारी हिडिसपीडीस, त्यांना दाखवल्या जाणारं दुय्यम स्थान, लाचारी, शोषण, मारहाण, या कटू वास्तवतेचा सामना करत, न डगमगता ताट मानेने ध्येय बाळगणारी, त्यासाठी झटणारी आणि रक्ताचं पाणी करणारी स्त्री एका आलौकिक निसर्ग शक्तीचं प्रतीकच म्हणता येईल.

       आगामी परिस्थितीचं विश्लेषण पाहता, बदलत्या प्रवाहानुसार आचार विचार ही बदलत चालले आहे. स्त्रीयांनी पिंजऱ्यातून निघून मोकळ्या आकाशात जगणं सुरु केलं आहे. त्यांच्या कारकिर्दी वाढत चालल्या आहे. लिंग भेद संपुष्टात येतांना दिसेतेय. कारण ‘चूल आणि मुल’ क्षेत्रफळ ओलांडून त्यांच्यातील सामर्थ्य जगाला प्रखरपणे झळकावणाऱ्या स्त्रियांचं प्रमाण वाढते आहे. “ये हम भी कर सकते है !” असं ठासून म्हणणाऱ्या उर्जायुक्त स्त्रीप्रजातिचा उगम होत आहे. नौकरी, व्यवसाय, शेती, संशोधन, सैन्य, कला, क्रीडा प्रत्येक ठिकाणी विजयी झेंडा स्त्रीच्या हातून फडकवल्या जात आहे. निथळ पाण्यासारखं चित्र जगाला दिसून येत आहे की, प्रबळ इच्छा शक्ती, अफाट सहनशिलता, उत्तुंग प्रेमवाहक, वीर कथांसोबत प्रेम कथांना अंकुरित करणाऱ्या ‘स्त्री’ ने ठरवलं तर ‘ती’ काहीही करू शकते !