शेतक-यांना मोबाईलवर कळणार ताजे बाजारभाव

नवी दिल्ली/ दि,७  – आता खेड्यात बसलेल्या शेतक-यांना मंडई ते शेतीपर्यंतची प्रत्येक माहिती मिळणार आहे. यासाठी सरकार एक नवीन नवीन यंत्रणा विकसित करीत आहे. संबंधित शेतक-यांचा आणि शेतीचा संपूर्ण डाटा सरकारकडे उपलब्ध असेल.
कृत्रिम बुद्धिमत्ता प्रणालीचा उपयोग करून, शेतक-यांच्या गरजेची प्रत्येक संभाव्य माहिती त्यांना योग्य वेळी कळविली जाईल. कृषी क्षेत्रात केलेल्या सुधारणांसह व्यापक बदल केले गेले आहेत. कृषी मंत्रालयाकडे पंतप्रधान-किसान योजनेंतर्गत दहा कोटी शेतक-यांचा डेटा बेस तयार करण्यात आला आहे. माती आरोग्य कार्डांच्या नोंदी आणि जमिनीची कागदपत्रेही बनविली गेली आहेत. शेतक-यांच्या गरजा व संसाधनांची सरकार काळजी घेईल. कृषिमंत्री नरेंद्र तोमर यांनी सांगितले, की देशातील विविध मंडळांमध्ये कृषी उत्पादनांच्या ताज्या किंमतींची माहिती सकाळी आठ वाजेपर्यंत शेतक-यांना त्यांच्या मोबाइलवर उपलब्ध करून देण्यात येईल. बाजार समित्यांबाहेर शेतीमाल खरेदी-विक्री करणा-यांनाही केंद्रीय कायदे लागू होतील. त्यामुळे शेतक-यांची फसवणूक करणे सोपे होणार नाही.
जूनपासून अस्तित्त्वात आलेल्या कायद्यानुसार आतापर्यंत अनेक राज्यांमध्ये शेतक-यांच्या तक्रारींवर त्वरित कारवाई करण्यात आली असून त्याचा फायदा शेतक-यांना झाला आहे. तोमर म्हणाले, की कृषी क्षेत्रातील कायदेशीर सुधारणांमुळे खासगी गुंतवणुकीचा मार्ग सुकर झाला आहे. अन्न प्रक्रिया उद्योगाचा वेग 25 टक्क्यांपर्यंत वाढविण्याचा सरकारचा उद्देश आहे. ब्राझील, इंडोनेशिया आणि अमेरिका यासारख्या देशांचा शेतीविकासाचा दर 50 टक्क्यांपर्यंत आहे. कृषी उत्पादनांच्या निर्यातीला प्रोत्साहन देण्याची नितांत आवश्यकता आहे, ज्यामध्ये कायदेशीर सुधारणा फार प्रभावी ठरतील. नवीन तंत्रज्ञानाचा वापर करून शेतक-यांना पीक विक्रीचा पर्याय देण्यासाठी ई-ट्रेडिंग प्लॅटफॉर्मची तरतूद करण्यात आली आहे. शेतमालाचे दर जाणून घेण्यासाठी सरकारकडून संस्थात्मक व्यवस्था केली जाईल, जेणेकरून शेतकरी बाजाराशी नेहमीच जोडला जाईल.